香港印象（三）

本年度最喜愛電影，叫做《The Man who Stare at Goats》，UA竟然肯上，堪稱《密探睥死羊》，比《盲俠座頭市》又更上了一層樓。東薈城係「香港唯一Outlet」，入面間Burberry又會唔係Outlet，十分迷離。樓下會所做Gym原來要跟隊，仿似打機，香港人做完一set要坐定，唔能夠行開畀你，同佢講「輪流做」會令佢好迷茫。我必須澄清，煲呔同我講果句叫「Good morning」，唔係「早晨」，唔好矮化佢。C'est bon!食物有進步，青口唔霉，生蠔唔臭，鵝肝唔反胃，侍應亦少左黑面。

港男幫女友攞手袋係多，不過個view都唔肉酸，我覺得Ｄ男仔表情快樂。講「唔該」係冇，不過幫人hold住度門，十次有七次曉講「thank you」。圓方個廁所好靚，金碧輝煌就美輪美奐，三格廁所都有人，之後兩個人同時出黎，一個Armani西裝Bally酒紅色皮鞋，戴勞力士；另一人身穿雜牌polo shirt牛仔褲，貌似工人。我走入其中一格，遇見一篤屎。

去工展好快樂，我係最年輕果5%人。只見一名工展小姐，真係冇辦法對住人狂影；原來佢會幫手賣野。有興趣前進，需要撞開人，女人推得勁過男人，阿婆大力過阿嬸。佢地推你係唔望你，以全身力氣用膊頭壓開你，全程木無表情亦唔講野，十分詭異。玩開工展既朋友會帶車仔，基本上拉既時期係唔睇人，或者係故意車人隻腳，原因成疑。好多垃圾桶，隔離有檯仔畀你食野，檯仔上面有垃圾。大家不約而同地嗌「好飽」所以要繼續試食。推坐輪椅既老人家黎既所謂義工係冇血性。原來全世界最好味既魷魚、最健康既茶葉、最高級既鮑魚都只會出現響工展會，「第二度絕對食唔返」，唔怪之得外國行展覽未曾聽過最乜乜乜最物物物，因為響晒香港工展。

發現香港人都會hold門畀人，但只會hold畀八十歲以上阿婆或BB仔。外國人係人都hold，所以勁Ｄ。大快活食完野攞個盤去倒，阿姐喝住叫我放返低，話果Ｄ野係佢做。入到廁所見到阿叔，小完便，我冇沖廁所。

我覺得鴻星Ｄ魚仔係世上最好味既零食。

香港印象（二）

成個信和都冇阿桑，可能我唔識搵，佢地話冇我信。原來連香港都冇鐵拳，三年前先施附近間地下機舖有，而家冇左，但有俄羅斯輪盤機、吃角子老虎機、麻雀機，我以為用代幣玩。終於搵到有講新加坡歷史文化既旅遊書，不過係英文，叫價百四，貴英國一倍多，原來英國好多野平Ｄ，例如旅遊書，又例如漢堡大王。見到間印尼餐廳，叫左個炸雞飯，佢畀左個大蝦炒飯我，我食左。柏斯間「小麻雀」好味好多。不過個叔叔好好人。佢係我今次返香港第一個講「唔該」既人，不過「多謝」我聽太多。

HMV都冇阿桑，問佢佢話冇，再問佢佢話有，唔知佢響邊度變出黎，我去華語女歌手果度睇明明冇。百五蚊一隻，兩隻三百，唔知係咪發死人財，蔡依林都係一百有找。鍾意《寂寞在唱歌》個封面多Ｄ，不過《受了點傷》Ｄ歌較動聽，因為有《葉子》。《葉子》詞曲均係陳曉娟手筆，內容頗有意思，例如「孤單是一個人的狂歡；狂歡是一群人的孤單；愛情原來的開始是陪伴。」認識阿桑，係因為佢幫《仙劍》唱主題曲，歌名叫《一直很安靜》，收錄響《寂寞在唱歌》專輯內。封底有台灣作家王文華既題字：「寂寞，是這一季的新流行。只是在寂寞的發表會上，不會有鎂光燈或明星。寂寞出來走台步的時候，步伐應該像阿桑的歌聲一樣：輕柔、卻同時沈重。」《葉子》副歌有一句「我一個人吃飯旅行到處走走停停，也一個人看書寫信自己對話談心……我想我不僅僅是失去你。」打開隻碟，印左句「love hurts」。

可能這才是某「問題」的成因？

香港印象（一）

今日去睇《風雲２》，某角色俾人打死果陣，有港男大叫左句「See you啦」，其女友隨即發出銀鈴般的笑聲，以示嘉許。離開戲院，見到《福爾摩斯》張海報，叫做「型爆聖誕」；亦有張《二十世紀之少年３》海報，隆重聲明「第二個朋友出現」。

搭��冇禁閂門掣，俾人鬧。食飯有兩種選擇，搭檯或者食個半鐘。Wild Fire個燒牛肉旁邊Ｄ紅椒好好味。Stephy本書錯字少過沈旭暉本《國際政治夢工場》。東京旅遊指南係十大暢銷書。中文旅遊書好多野食，好多野玩，景點介紹有百零字。

回家途中聽電台節目，有人把聲好似木村，真情果個。佢個節目講電影，佢女拍檔將成套法國電影既橋段講晒出黎，係非常詳盡既電影介紹節目。佢地亦有講福音戰士套新電影版，我從未睇過任何版本，我而家知晒成個故事講乜。

p.s. 莫華倫唱緊「一八七八三三三」。

有人升職

英式早餐：記憶練習

回港在即，故特意到鎮內一小店享用本年度最後一客英國早餐。該小店位處偏僻，人跡罕至，本人到訪多次，仍未嘗見得一名異鄉客。該店店面甚小，只有一張六人桌及一張三人桌，今晨八時半至十時正期間，連本人在內共有八名人客幫襯，分別為六名白髮老婦，一名中年修路工人及一名亞裔電車男。店內三名侍應，清一色為金髮白種少女，全操黑區口音，並裝扮成聖誕女郎以娛賓。除觀賞聖誕女郎外，客人亦可選擇閱讀店內提供之小報，今晨提供的有《太陽報》、《每日之星》及《每日鏡報》。現試回想其中兩份小報之主要內容，以作記憶力練習。餘下一份，由於本人未曾閱讀，故無法記得。

兩份小報，均以英國歌唱節目《X Factor》大熱參賽者Joe先生表示可能於決賽當晚跳舞為頭條，Joe先生認為只憑歌藝出戰將降低勝出機會，因為英國民眾傾向支持歌舞雙全的選手。節目評審兼製作人Simon Cowell同意Joe跳舞將有助他爭取選票。

翻開首頁，兩份小報均刊登了佔全版面積近一半的裸女照片。該照片並非廣告，亦非報導，照片中之女郎皆為全裸，打世界光，乳房及乳頭清晰可見，風格類似《Loaded》雜誌內的裸照。以手機發短訊至某號碼，可獲裸女桌布一張。

警方揭發了一宗販賣性奴隸案，逮捕了三名疑犯。據了解，有人懷疑在光天化日下倫敦最繁忙的街道牛津道上向路人兜售性奴隸，索價三千英鎊一隻，可議。警方根據閉路電視所拍之影像，逮捕了買賣雙方共三名男子，三人全是英國妓院經營者，賣方同時參與偷運性奴隸入境活動。從報章刊登之照片可見，該名來自拉脫維亞的性奴隸當時也在場，據稱是被迫的。有消息指出，每年被非法偷運進口之性奴隸，大約為四千隻，當中大部份是被騙來英的。記者以「邪惡」、「卑鄙」及「喪心病狂」來形容那名疑犯。那名疑犯至今仍是疑犯。

數月前被男友「殘殺」至死的英國少女原來是個好女仔，兩份報章均以全版報導。據了解，該名少女十分愛國，喜歡唱歌，很用功讀書，所以不應被殺。報章上的照片顯示，該少女很喜歡參加狂歡派對，經常露出「可愛」笑容，可見心地善良。記者訪問了死者的雙親，他們均表示女兒心腸很好，證實了受害者心地善良不應被殺的說法。

即將上映的《阿凡達》，製作費共三億美圓，比《鐵達尼號》高出兩倍有餘，為史上最貴電影。據稱，其中一家為《阿凡達》製作特效的公司，需同時使用上萬台電腦共三萬顆中央處理器。報導又指，製作一秒的畫面，平均需時二千四百小時，亦即不睡覺不吃飯不上廁所不停工作，也要花一百天才能完成一秒畫面。此片於二零零七年正式投入製作，片長共一百五十六分鐘，亦即九千三百六十秒。

佔兩份報章一半內容以上的體育版，報導了基斯坦奴朗拿度因裸跑被罰離場的新聞。據了解，史上最貴的足球員朗拿度，日前為皇家馬德里射入一球後，因興奮過度脫去上衣，隨即被球證趕離場。朗拿度事後表示後悔，又自稱不知道在西班牙踢波不能脫衣，並承諾以後不會再犯。記者以「英雄」形容朗拿度，又以他比作「變形俠醫」，因為兩者皆擁有很性感的腹肌。原來朗拿度每天至少做三千次仰臥起坐。

在野保守黨黨魁甘民樂反駁首長白高敦上週發表的「階級」言論，好像是《太陽報》今日唯一一則政治新聞，佔全版約六份一面積。

白馬嘯西風隨想

《鹿鼎記》被內地同胞評為中共建國六十年間十大爛書之一，有港人立即嬲爆爆地說此書明明是查大俠最也登峰造極之作，連隨狂吋內地人果然不懂品書。《鹿鼎記》為滿清入關說項，又「歌頌流氓文化」，愛國俠士厭惡此書，也可謂其來有自。有人猜想這可能又是無間道，可能內地人其實最喜愛此書至真，但這番話未免太也辱沒了一眾內地同胞，因為不屑「流氓文化」的他們往往有話直說，又怎如你們香港人那般虛偽？其實早在零七年劉天賜、陶傑與倪匡於《斑馬在線》以此書作引子討論中國近代史之時，內地網民已大表不滿，youtube的留言版就有不少類似意見：

「照这种观点，香港人很喜欢被殖民罗。」

「用小说说历史.哈哈……倪匡无知!他也只能是写写小说而已.历史是需要仔细研究推敲的, 但凭几本小说他就能妄下定论?」

「……这三个支持人处处都拿《鹿鼎记》来论证历史上的吴三桂是不是汉奸，哈哈哈哈。这种节目和我们大陆的百家讲坛比，真是笑死人了……」

三名「支持人」談的明明是史觀，而不是史實，大清之治亦非殖民，但這是題外話，在此按過不表。想指出的是，內地人對《鹿》之史觀不敢苟同，乃是堅talk talk之事實，絕非波叔式反諷。一部小說，百種解讀，乃是廿一世紀後現代意識掘起的必然現象，雖說他者的見解你未必認同，但百花齊放，也總比以往唯儒家史觀獨尊要進步一些。況且喜好這種事，也很是強迫不來，就算某人明白此書的美妙之處，也有權不喜歡的。不喜歡就是不喜歡，從沒甚麼道理。不過假若只因為《鹿》「歌頌」的並非大俠，便批評此書不好，就有點讓人摸不著頭腦了。

香港有位才女，被抬舉為「唯一擁有獨立思考的人」，全因她「係唯一話龍應台本《大江大海》唔好既人」。假如覺得《大江大海》唔好，就等如擁有獨立思考，那麼憤青們就統統擁有獨立思考了，這也不失為一樁美事。可是那位才女的論點，卻又有些站不住腳，簡單而言，她的意思大概是「歷史書應該咁樣咁樣」，又「應該有呢Ｄ呢Ｄ野」，而由於《大江大海》唔係咁樣咁樣，又冇果Ｄ果Ｄ野，所以就唔係一本好既歷史書。這是當代比較文學式的思考進路，基本上，他們會首先定義了何謂好的「ＸＸ」，然後再研究某「ＹＹ」合不合乎那些定義，假如不合乎，就大功告成地高呼「ＹＹ不好」。他們似乎無法明白，「ＹＹ」不是「ＸＸ」，也不等如它就是不好的。例如我話靚女應該有對波，由於你阿爸冇對波，所以你阿爸唔靚，通否？

《鹿鼎記》並非唯一因為沒有歌頌大俠所以唔好的金庸小說，另一部被貶為「最差金庸小說」的《白馬嘯西風》，就沒有歌頌大俠。倪匡亦曾言道：「《白馬》在金庸作品中排第十四位。」這部小說，的確沒有歌頌大俠；它講述的是一個少女故事。這部「排第十四位」的小說，卻是我最喜歡的金庸作品。依照上述的神奇邏輯，這證明了我是唯一擁有獨立思考的人。

《白》乃是唯一以女性為主角的金庸武俠小說。女主角李文秀，雙親早亡，自小流落於哈薩克地區，被好心的計爺爺收養。在哈薩克定居不久，文秀便邂逅了一名哈薩克少年蘇普，二人很快成為知己，文秀亦對他情根暗種。可惜蘇普的爸爸蘇魯克對漢人甚是痛恨，文秀為免蘇普難做，便悄悄地離他而去，只偶爾地在遠處瞧他幾眼。蘇普很快便愛上同族的美貌少女阿曼，文秀雖然深知二人彼此相愛，但還是無法割捨這段感情，一愛便是十二年。最後，文秀救了情敵阿曼的父親一命，蘇魯克亦終於十分政治正確地明白「哈薩克人中有壞人，漢人中也有好人」的玄妙道理，還大方地讓文秀在數百名族人中任意挑選丈夫。這時候，文秀早已明白蘇普愛的確是阿曼，但她還是對其他男人全無興趣，便選擇孤身離開哈薩克回中原去。正如故事結尾她所說的：「那都是很好很好的，可是我偏不喜歡。」

雖說這部小說也有探討種族仇恨、人心險惡等大路野，但都是淺淺帶過便算；著墨最深的，仍是一段段扭曲而淒美的愛情故事。李文秀的悲劇，其實是她自己一手造成的，當年蘇普本已把定婚信物送了給她，她卻故意把信物暗中轉贈予阿曼，親手撮合這本來不可能走在一起的一對，全因她一廂情願地覺得只有阿曼才配得起蘇普。由此可見，文秀根本就是那種享受苦戀感覺的少女；垂手可得的，她反而不要。明明人家本來喜歡的是自己，卻硬要覺得自己配不起對方，誓要看著他跟別的女孩纏綿才過癮。

香港有對情侶，男的風流倜儻、才情洋溢，女的貌美如花、善良體貼，可謂是天造地設的一對。數月前，那女的卻突然提出分手，理由是「我拳手黎架咋，我配你唔起架。」原來那男的是月入廿萬的金融界才俊，女的卻「不過是」一名酒吧拳手。分手的理由，跟李文秀如出一轍；背後的邏輯，卻是大相逕庭。唯一異曲同工之處，大概是兩段故事都教人感到很可惜。

義無反顧同抗Facebook不該收費計劃

Facebook即將收費的傳言鬧得沸沸騰騰，已非首次。云云三億五千萬用家當中，還沒聽過有哪位是支持收費的，放眼所見的上百個群組、留言版，基乎都是異口同聲地強烈反對這建議，說甚麼假如收費一事落實便立即罷用Facebook云云，還痛斥動議者十分下流不該。細問友人收費不該者何，友人說Facebook收費不合理，因為這種社交網站理應是不收費的，例如myspace就不收費，所以Facebook也不應收費。

右派學者常說世上沒有不合理的價格，只有錯誤的價格，而錯誤的價格亦即未能為商家賺取最大利潤的價格。假如只是拍賣一幅名畫，只要有人肯買，那賣價當然是愈高愈好。但假如說的是量產商品，那麼高定價就不一定能帶來最大利潤。以食肆經營為例，雖然三十元一碗魚旦粉也有人買，但假如每天只能賣出一百碗，那還不如每天賣出三百碗二十元的魚旦粉划算。不過食肆座位有限，商業策略較為簡單，只要能保持座無虛席，那仍是愈賣得貴就愈好。名牌手袋市場則較複雜，要考慮的因素較多，但基本上仍是以能長遠為公司賺取最大利潤為依歸。有說名牌手袋貴得離譜，但在右派學者眼中，價格根本就沒所謂離不離譜，只要該售價能為手袋公司謀取最大利潤，那就是正確的售價。本年年初，港台製作了一系列有關金融風暴的節目，訪問了一位街市茶餐廳東主，那東主說為了與街坊共度時艱，決定割價出售各式食物，就算賠本也在所不惜。乍聽之下，這東主作的實在是一件美事，但問題在於，假如他不減價，那是否可以賺得更多利潤？假如不能，那麼他所說的甚麼「共度時艱」，就不過是裝裝門面的大話。說到底，他還是想要為自己賺取最多的利潤。

世上沒有太貴的手袋，只有沒人買的手袋；沒有收費不合理的服務，只有沒人選用的服務－－這是右派學者的基本信仰。有說這立場以利潤為唯一考量，忽略了社會承擔，但右派學者卻認為，以利潤為唯一考量乃是天經地義之事，是行商的合理態度，至於賺錢後是否要回饋社會，那是另一回事。

Facebook創辦人Mark Zuckerberg，乃是哈佛大學畢業生。哈佛商學院素以左傾經濟學理論聞名，美國民主派新總統奧巴馬，就正是哈佛出品。哈佛反對單以利潤掛帥的右派理論，是不爭的事實，雖也出過布殊、費斯坦一類的反骨仔，但畢業生還是以左傾者為主流，其經濟學院甚至曾把佛利民的《價格理論》視為禁書。Zuckerberg一直不肯落實Facebook收費之計劃，也未知是否跟其充滿社會關懷的學統有關。不過打從大右派強人李嘉誠大手購入將近五億港元的股權，Facebook是否仍然不會收費，就實在難說得很。

喬治布殊乃是唯一讀過MBA的美國總統，但哈佛的碩士課程顯然未能動搖他對耶魯的忠心，是以上台八年，推行的盡是極右經濟政策，其減稅幅度甚至創下歷史新高。後來美國在金融風暴中傷亡慘重，有人認為這是右派經濟理論行不通的鐵證，例如以往克林頓那相對左傾的政策就很成功，某社會主義大國亦堪稱在金融風暴中迄立不倒。奧巴馬總統的上台，顯示了美國人民對社會主義的祈盼，但以往布殊總統當政之時，亦不見得有人支持Facebook收費。

不過反對收費是一回事，收費後是否真的會罷用Facebook又是另一回事。Gucci手袋這數年間不斷加價，假如找些Gucci粉絲訪問，相信也不會有人覺得加價比較好，因為大家都知道而且相信，他們熱愛Gucci並非因為它賣得貴，而是因為它靚。可Gucci加價後的銷量仍然不減反增，反映大家雖然反對加價，但只要覺得值得，最後還是會買。所以反對加價並不代表反對右派思想，說穿了那不過是個人利益考慮，而以個人利益考慮為依歸就正正是右派立場。Facebook收費與本人利益有所衝突，所以我也不贊成收費；但假如它真的收費，坦白說，我多半還會繼續使用。假如我是Facebook的投資者，只要能確定收費後將獲得更多利潤，我實在想不到有甚麼理由不收費。現在Facebook還不收費，並非因為股東們慈悲為懷，有意造福網民，而不過是因為還未能肯定收費後是否真能帶來更大利潤罷了。

也有說Facebook收費將導致窮人無法使用此服務，以至無法打入主流社會圈子，會被社會邊緣化云云。看來他們並不知道，大部份付費網路遊戲的玩家，其實正正是低收入所以低品質的電車男。況且有能力購買電腦上網之人士，也不見得會付不起區區數十元的月費，所以那些社會主義理論家實在未免過慮。

反收費自然是要反的，不過口口聲聲斥責收費者下流不該，就未免有點兒滑稽。但假如站在道德高地故意詆譭其人格真能達到反收費的目的，那亦不妨詆譭。至於「鬧人做乜要賺錢」這行為本身是否不該，一眾社會主義理論家也管不得那麼多，反正大家骨子裡其實都是大右派，只不過「濟弱扶傾」等口號喊出來比較動聽。

第四十四回：李太白草書嚇蠻賊，小小琪巧舌鬥港男

小小琪：又插港女，你正一賤男。

乙：我愛插港女呢壇野，乃是與生俱來，半點也戒不得。醫生話我唔插港女，就會有惡運降臨，所以這是不得不插呀。

小：亂講，你個咩醫生黎架，收得好貴？

乙：為左你，貴貴都係抵。

小：咁你個叫咩病？

乙：唔插港女冇仔送終病，非常大鑊。

小：你可以插鬼妹，插大陸妹都得格。

乙：佢地冇野好俾我插。

小：都係女人唶。

乙：你地女人Ｄ。

小：真係俾你激死人，你講果Ｄ呀港女Ｄ唔好野呀，人地講過晒啦！

乙：人地講過唶，我未講過喎。

小：咁人地講過你又講黎做乜。

乙：講黎過癮囉。

小：都話咯，我想搵個有錢老公都係因為賺錢能力強既男人普遍黎講品質較高，搵個品質較高既男人有乜問題先。

乙：冇問題格，咁點解你唔乾脆搵個人品好既男人，而要睇對方有冇錢呢？

小：因為我所講既品質高正正等如賺錢能力強。

乙：但本來我地講親人品好唔好都唔係講緊呢Ｄ野喎，係講緊某人心地好唔好呀，對女朋友好唔好呀，性格美唔美妙呀果Ｄ野丫嘛。

小：咁搵到錢既男人都唔一定性格好格！

乙：咪係囉。

小：但我想要錢喎，冇三萬蚊個月都唔係人。

乙：唔係人係乜？

小：係粉餅。

乙：人地問乜野係粉餅喎，你點回應？

小：買唔起LV畀女友者，粉餅也。

乙：其實LV有乜好？買AV得冇？

小：人人都有，所以唔買唔得囉，重要買monogram添，慌死人唔知。

乙：我冇喎。

小：你都唔係人。

乙：但我有買LV畀你喎。

小：又鬧人買名牌，自己又買名牌畀女朋友，五十步笑百步，可笑可笑。

乙：人有所以你又要有，咪好膚淺囉？

小：個個同事都有，如果我冇，咪會標奇立異囉？你唔係女仔你唔知，冇返十零廿個LV撐下場，人地會當你唔係自己人，會排擠你，響背後中傷你，踐踏你，咁何謂呢？

乙：唔係喎，佢地話名牌靚喎。

小：人講你又信，如果唔係買黎畀人知，又唔見佢地買名牌衫？因為買名牌衫冇人睇得出丫嘛！八千幾蚊買件褸冇人知係Gucci，買黎做乜呀？傻架？

乙：咁唔係個個女仔都係咁既，你同Ｄ唔會因為你冇名牌而排擠你既人做朋友咪得囉。

小：但我Ｄ同事個個都係咁丫嘛。

乙：可能大家都係因為怕自己冇會俾人排擠所以先買呢？不如你地開心見誠問下對方，話喂，你係咪因為我有所以先買呀？嘩你又係牙？咁不如大家都唔好買囉。

小：傻既，佢係都唔會認架啦。

乙：零和遊戲呢Ｄ野，大家都估對方係壞人，對大家都冇好處架喎。

小：其實買個LV唶，又唔係話買唔起，有乜所謂喎。

乙：Ｄ錢夠你去旅行喎，又話想去日本既，又成日話冇錢去。

小：所以咪要搵個品質高既男朋友囉。

乙：有錢就有錢啦，係要話品質高，虛偽。

小：喂，你咁講我好hurt架喎！人人話我虛偽都可以，但你話我就唔得！

聾貓：虛偽。

小：我唔係呀！

聾：講緊乜野咁開心？

乙：插港女囉，好過癮架，一齊丫？

聾：唔哪，女仔係愛黎尊重既。

乙：嘩你重虛偽。

小：人地好人你又話人虛偽，睇下你Ｄ港男幾衰丫，重好意思話人。

乙：咁插港男囉。

聾：哼，你Ｄ港男就真係賤到冇人有啦，個個都係狗公黎既，明明自己有女朋友，都重要出去搞三搞四。

小：係囉，上次咋嘛，我響間意大利餐廳食飯，隔離枱兩條狗公突然撩我講野喎，真係勁賤格囉。

乙：我上次同阿甲食飯都有兩個內地女仔撩我地講野喎。

小：哼，睇下果兩條姣婆？發仔瘟咩！

乙：咁人地又冇你地咁矜貴。

聾：唔好再講啦，港女已經好慘架哪，而家陷世界都知港女Ｄ衰野，貪馨香咩。我係香港人都覺得醜囉。

小：點解又扯到去成龍大哥果庶？

聾：插港男丫嘛。

小：成龍就真係賤男人版啦，有個咁好既老婆都重要出去搞三搞四。

乙：咁家花又不及野花香。

聾：其實香港女多男少，港女又好少鍾意同其他國家既男仔拍拖，點解佢地眼角都重可以咁高架呢？唔合乎供求關係喎。

小：所以你冇理由走黎話我格，而家係你地買名牌畀我，幫我攞手袋，送我返屋企，請我去置地食法國餐，唔係我主動要求架喎。我叫過你唔好再送Gucci畀我格，我話過唔好食咁貴架喎，我都話我可以自己返屋企格。咁而家你地係要咁侍奉我地，我地有公主病都係你地一手養成架喎，你地全體港男一齊唔好再做果Ｄ野，我地久而久之咪唔會要求咁高囉。係你地死要行家做爛市咋嘛，有乜理由鬧我地買得平架唶。

乙：人地咁做，我唔做，咪會溝唔到女？

小：我地性格咁豈有此理，又唔見我地溝唔到仔？香港重要女多男少添！可見係我地女仔玩零和遊戲叻唶，你地玩輸左，要怨就怨自己囉。

聾：係囉，我四千蚊個月，點買LV唶！一日都係你班高質港男衰，搞到Ｄ女仔要求咁高，唔騷我。

乙：咁同閣下既尊容都不無關係既。

小：你估我地係你Ｄ臭男人牙？我地唔一定鍾意靚仔架喎，你生得咁肉酸，我夠揀你啦。

乙：但我有送LV畀你有請你食置地喎。

聾：所以真係因為港男白痴仔？點解佢地有bargaining power都重要做爛市呢？又唔見Ｄ女仔做爛市？

小：原因係乜我唔理，而家我係想指出呀，個個男朋友都係咁對我，咁我就梗係覺得係老奉架啦。你地成日話鬼妹唔係咁，咁梗係啦，人地個個鬼仔都唔會送LV請食飯，咁Ｄ鬼妹咪唔會覺得有問題囉。所以歸根究底都係你地唔啱。

乙：對你好都係我地唔啱？

小：你地又要主動買名牌畀我，轉過頭又要插我地貪慕虛榮，咁顯出Ｄ乜呀？顯出你地心胸好窄囉，明明孤寒又要充闊佬囉，充完又要肉赤囉，重要怪人地好收你Ｄ禮物囉，真真核突。

乙：係有雞先定有雞蛋先，而家好似係因為你地鍾意，所以我地先會做果Ｄ野喎，如果唔係我地點會做呀？

小：你地夠鍾意玩相機咯，又唔見我買個幾皮野既定焦鏡畀你？

乙：所以對你好都錯，你對我衰反而係你啱？好似有少少戾橫折曲喎。

小：對我好冇錯，錯係錯在你地走黎怪我肯畀你對我好。

聾：咁你地又唔對男朋友好Ｄ？

小：五蚊可以買到個橙，我做乜要畀十蚊呀？

聾：因為畀十蚊對方會開心Ｄ囉。

小：咁係你豬兜唶，我地呢Ｄ挑通眼眉，唔會買貴野。

聾：而家講緊拍拖喎，愛情喎，邊有得咁計架唶！

小：都話呢度香港咯。

第四十三回：搖滾天皇

小小琪：歡迎大家收聽今晚既《廣東趕雞》，嘩阿乙，今晚我地呢位嘉賓都算重量級喎，係咪呀？

乙：係呀，今晚我地好榮幸可以請到香港一位玩音樂既前輩上黎同大家傾計，嗯，不如你自己同各位聽眾打聲招呼？

春雨聲：Yeah，大家好，我係春雨聲，好高興今晚可以上黎講下而家香港樂壇既問題。

乙：可能年青一輩既朋友對春雨聲呢個名字較陌生啦，其實我地老一輩既香港人個個都好鍾意佢既，佢響八十年代果陣唱既首首歌都係經典黎架喎。

小：係呀，例如你果首《圓圈交叉》，嘩簡直係經典中既經典呀。

春：Yeah，that’s right，係呀，我以前好多歌都係經典黎既，其實我九十年代都出過一隻碟，好多朋友都話係天碟添。

乙：咁其實你覺得而家香港樂壇有乜野問題呢？

春：Right，yeah，頭先你講得好啱，我地以前好多歌都成為左經典，但你有冇發覺，我地以前係冇經典既？

小：又係喎！點解會咁架呢？

春：我地以前聽親Ｄ歌都係流行曲，即係當時流行既歌。咁點解而家Ｄ人咁鍾意聽返Ｄ舊歌呢？好明顯係而家Ｄ歌質素係下降左。

乙：但以前流行曲啱啱興起，邊有舊既流行曲聽？其實果時我地都有聽舊歌格，粵曲咪係囉。

春：我地以前好鍾意玩搖滾樂既，我就係玩搖滾樂既，不過而家已經冇人玩搖滾，我覺得真係好可惜。你睇下而家Ｄ唱片公司，佢地已經唔叫自己做唱片公司，而係叫乜野娛樂有限公司。咁好清楚，佢地已經唔係賣音樂架哪，所以成日會推Ｄ歌手去拍戲呀咁。

乙：但你果時都有拍戲喎，重拍無線劇添。

小：係囉，我都覺得而家香港已經冇搖滾樂呀，所以想聽返搖滾樂就唯有聽返你Ｄ舊歌啦。

乙：但我地而家有搖滾樂喎，Mister咪玩搖滾架囉，佢地上年先出道，新樂隊黎架喎。

小：我講香港樂壇呀！

乙：Mister係香港樂隊黎架喎，你唔知就話香港已經冇人唱搖滾樂？

小：咁冇以前咁受歡迎囉！

乙：以唱片銷量黎計，搖滾樂從來都冇受歡迎過流行曲喎，就算係Beyond都唔夠其他歌手賣得架喎。

小：但Beyond係人都識丫嘛！

乙：你識唶，我阿媽就唔識勒，就好似你而家唔識Mister咁，但好多年青人都識佢地架喎，上年重響Ｄ頒獎典禮攞左六個獎添。

小：不如等我地聽返隻春雨聲既《好狗不見》，畀大家聽下真正既搖滾樂係點。

春：好狗不見～～啦啦啦～～嘰哩呱啦～～好狗不見～～

小：啪啪啪啪啪！

乙：啪啪啪。

小：嘩，我真係覺得你Ｄ歌好有味道囉，真係同而家Ｄ流行曲好唔同囉。

乙：但都唔係搖滾樂，似流行曲多Ｄ。

春：哦，咁搖滾樂又唔一定要快既，好多搖滾樂都係慢歌黎。

乙：所以你呢首歌算係搖滾樂？

春：當然啦。

乙：你呢隻碟係今年新推出既？

春：Yeah。

乙：咁而家咪有搖滾樂囉，你又話冇？

小：不如講返而家香港樂壇既問題啦。唔知除左音樂工業娛樂化之外，香港樂壇重存在住乜野問題呢？

春：咁最嚴重既問題大家都知道就一定係非法下載mp3啦，呢個問題其實美國都有。保守估計呀，盜版音樂至少令MJ賺少左10%。

乙：六四屠城令中國經濟起飛。

春：痴線，你又知唔屠城中國經濟就唔會起飛？可能唔屠城中國而家會更有錢？

乙：咁你又知如果冇盜版MJ會賺多10%？可能冇盜版佢反而會賺少左20%？

春：除左好明顯係盜版令到音樂質素下降之外，大家有冇發覺而家大家已經冇一齊聽歌？已經冇左流行榜？

乙：你講乜呀，個個電台都有流行榜架啦。

春：而家Ｄ頒獎典禮，好明顯有個分豬肉既情況響度，認受性已經大為下降。

小：你意思係有黑幕？

春：Yeah，可能講出黎唔係咁好啦，但其實大家都知而家Ｄ頒獎禮基本上都係內定既，所以我先冇獎。

小：係囉，而家Ｄ歌真係感受唔到佢將來會變成Classic呀，首首都差唔多既。

乙：我覺得謝安琪Ｄ歌幾好聽丫。

春：講起流行榜，大家可能唔知，果陣時我首《空等》其實好勁既，本來佢地話可以畀個四台聯播大獎我，但後黎Ｄ唱片公司話《空等》個名唔好意頭，所以先畀左個獎阿倫，係真既，yeah。

乙：你意思係其實以前Ｄ獎都係內定既？

小：係喎，上次四川震災電視台搞左個籌款晚會，我見到好多前輩歌手都有上去，點解你冇去到既？

春：其實我四川都有唱，不過係去隔離台唱，果晚成個節目得我一個咁有份量既歌星響個台，不過我都有唱，yeah。

乙：咁點解你唔響無線唱？

春：Yeah，其實我條搖滾路一直都走得好崎嶇，起起跌跌咁。果陣時我好想玩自己既音樂，不過唱片公司唔畀。後黎我家姐將佢所有積蓄畀晒我，同我講，春雨聲，你唔好再幫唱片公司做野哪，你攞Ｄ錢玩自己想玩既音樂啦。果一刻我好感動，真係超感動。

乙：原來唔係冇人幫你出碟所以你唯有自己畀錢出？

春：但好可惜，後黎我家姐過左身，不過我都攞左Ｄ錢去出碟，玩返自己想玩既音樂。

乙：所以係佢死左之後你先攞到Ｄ錢？

春：Yeah。

小：節目時間都差唔多哪，不如我地聽下Ｄ聽眾電話囉，好冇呀？

乙：好，喂，請問你點稱呼呀？

聾貓：下？

乙：我問你點稱呼。

聾：喂？喂？

乙：係你呀，到你哪，你點稱呼呀？

聾：哦，我叫聾貓！

乙：個名幾得意喎。

聾：我聾架嘛。

小：係，你有冇Ｄ乜野想同阿春雨聲講咁呢？

聾：嘩，我真係勁鍾意你Ｄ歌囉，我覺得你講得勁啱呀，而家Ｄ流行曲真係一句講晒係垃圾囉，我同成班朋友都係鍾意聽返你Ｄ歌。

春：多謝晒，聽你把聲你應該好年青？

聾：下？

春：我話多謝晒。你今年幾多歲呀？

聾：我二十歲，但我好鍾意聽你Ｄ歌，而家Ｄ流行曲真係全部都係垃圾囉。

乙：流行曲即係呢幾年推出既歌？

聾：係呀。

乙：春雨聲呢幾年都有出新碟喎，所以佢Ｄ新歌都係垃圾？

聾：係呀。

乙：你阿媽係男人？

聾：係呀，我食左飯lu，唔該。

小：我地重有幾分鐘，你重有Ｄ乜野想同我地春雨聲講呢？

聾：我想問你食乜野奶大架，咁叻可以玩咁多樂器既？

春：哈哈，其實我地呢Ｄ玩音樂既，同而家Ｄ歌手好唔同，我地以前個個都識玩幾種樂器既。

乙：謝安琪都識彈結他同鋼琴架喎，重考左八級添。

小：今日節目時間都差唔多哪，好多謝春雨聲上黎同我地傾計，不過都好似唔係好夠喉咁，不如約定你下次上黎傾過囉。

春：Yeah，一言為定。

小：好，咁而家等我地聽返節新聞先，轉頭返黎有我地李思迷既《講數人生》。

乙：呼。

小：呼。

春：Yeah，咁幾時再叫我上黎做節目？我幾時都得閒架喎。

小：得閒先丫，得閒我地再聯絡你。

春：不而下個禮拜丫，下個禮拜我得閒。

小：下次先丫，下次一定要再搵你上黎同我地傾計。

春：咁好啦，下次先啦，再見。

小：再見！

乙：拜拜。

小：……

乙：……

小：喂！你頭先做乜係咁吋人地唶？人地話晒都係嘉賓丫！

乙：其實我覺得佢Ｄ舊歌都幾好聽。

小：咁你又吋佢？

乙：佢有自信丫嘛。

小：有自信有乜野問題呀！

乙：呢度香港喎。

張敬軒榮獲白金証書

以下內容節錄自環球唱片官方網頁：

「去年我們見證張敬軒【酷愛】於HMV銷量榜連續5個星期高居冠軍位置，短短半個多月更衝破了金唱片數字，勇摘金唱片殊榮。軒仔於樂壇上的努力漸見收成，樂壇並沒有辜負這位一向以心血，各個單位的樂壇頒獎禮均給予他應有的獎項，贏了勝利的一仗，只以香港計算，歌曲及男歌手獎項已超過15個！

承接07年的福氣，08年的張敬軒勢如破竹，5年以來第一隻精選碟【my 1st collection】衝破白金銷量，至今賣出超過3萬張，是08年第一位白金男歌手！環球唱片亞太區總裁暨國際市場及藝人事務副總裁Mr. Max Hole蒞臨，並於IFPI國際唱片業協會(香港會)總裁Mr. Ricky Fung見証下，頒發白金唱片予張敬軒。軒仔表示很開心大碟有此佳績，亦很感激傳媒朋友及歌迷對自己多年來的愛戴，他承諾會繼續努力，相信只有是有質素的音樂，仍然會得到樂迷的支持，他說:「我好開心可以我到呢張A4紙(白金証書)，係一直以來事業上幫助我的人的成果。環球的大老闆Mr. Max Hole遠道而來頒發白金唱片俾我，真係好榮幸。去年的成績確實係意料之外，減少了創作，專心唱歌，不過得到公司的肯定，傳媒朋友的支持，我的努力沒有白費。」」



1979年，甄妮推出首張個人大碟《奮鬥》，兩個月內賣出二十五萬張，累積總銷量達八十萬。1985年，梅豔芳的《壞女孩》共賣出四十萬張，創下最高年銷量紀錄。同年，譚詠麟的《愛情陷阱》更賣過十白金（五十萬），同一年推出的《暴風女神》亦賣出八白金（四十萬）。1990年，Beyond推出的《命運派對》共賣出十五萬張，獲三白金獎。

從前，唱片銷量至少要達五萬張才能獲頒白金証書。2006年起，香港國際唱片業協會（IFPIHK）改變制度，把獲取白金証書的門檻降低一倍，改為二萬五張。故此，張敬軒於08年推出的《my 1st collection》雖然銷量不足四萬，亦算是白金唱片。08年開始擔任IFPIHK主席的吳雨，為英皇娛樂的現任行政總裁。

英美的白金証書門檻為一百萬張，此制度至今未變。

為Chick Flick平反

唔講大家實唔知，其實我比較鍾意自己一支公入戲院睇戲。咁你可能覺得奇，阿琪姐你索到咁既地步，點解搵唔到人陪睇戲呀？係咪我睇親Ｄ戲都太有深度冇人有興趣睇呀？咁你又錯喎，我其實乜戲都睇架喎，而且睇得最多既，正正係所謂好cheap既chick flick。

其實乜野係chick flick呢？基本上，就係畀女仔睇既電影。咁乜野電影係畀女仔睇既呢？簡單黎講，就係愛情電影。有叻唔切既港男可能會話，唔係噃，唔係部部愛情電影都係chick flick喎，只有果Ｄ內容講述一堆高質男人同時瘋狂愛上個毫無吸引力既女主角等Ｄ女觀眾可以精神自慰果Ｄ至算係喎。呢個其實係誤解－－冇錯，好多chick flick既內容都係咁，例如《BJ單身日記》、《單身大急救》、《吸血新世紀》，又例如亞洲代表作《我的野蠻女友》、《流星花園》及無線所有劇集等等。唔明點解無線劇集都有助女觀眾精神自慰既朋友，不妨參考下《老婆大人》同《同事三分親》。

不過，西方人所指既chick flick，其實包括但不限於呢類型既電影。Chick flick呢個概念黎自chick lit，亦即係畀女仔睇既書，呢類書雖然全部都同男女關係有關，但就唔一定係講述冇吸引力既主角如何俾一堆高質男人狂追，例如文學水平甚高既《傲慢與偏見》，就一致被公認為「chick-lit masterpiece」；又例如《女人來自金星，男人來自火星》，就直頭唔係小說，但就一樣被指為係chick lit。所以，最近上映既《求婚的惡魔》，雖然女主角社會地位比男主角高，而且基本上係倒追男主角，但都算係chick flick。由此可見，Ｄ懶有深度既西方男人鬧黎鬧去，就係鬧我地Ｄ女仔鍾意睇愛情電影，因為佢地覺得將重點放響愛情關係既商業電影毫無深度，冇乜野訊息想表達。但好有趣地，同一班男仔，又會成日走去睇喪屍片同超級英雄電影。

其實點解電影一定要好有深度呢？淨係旨在令觀眾心情愉快又有何不可？有位高質港男成日嘲笑韓國愛情電影冇深度，淨係識令到Ｄ女觀眾覺得好感動好感動，所以係垃圾。佢話佢覺得果Ｄ電影係垃圾，係因為佢地套套都講到Ｄ男仔點樣為女主角犧牲，教壞晒Ｄ港女。但我叫佢講一套佢覺得唔係垃圾既愛情電影，佢又講唔出，所以講到尾佢根本就覺得逢係愛情電影都垃圾。溝得鬼仔多都幾悶，加上鬼仔又唔會送Gucci LV請食飯，所以我有時都會發發善心同呢位高質港男出下街睇場戲。我發現，呢位港男每次睇戲都會同我講野，主要係同我講果段情節有乜野想暗喻呀，果句對白又有乜野深意咁。我終於明白佢點解唔鍾意愛情電影。

冇錯，有Ｄ作品係需要分析先能夠享受既，例如Baron Cohen既mockumentary系列，如果你唔用心分析佢Ｄ對白，你根本就唔會明佢想講乜。好似佢響《Brüno》系列裡面，就成日以名牌崇拜者既姿態訪問班設計師，令佢地疏於防範。一次，佢問個設計師：「我超同意你話runway show唔應該用紙板囉，你可以對我地Ｄ奧地利觀眾解釋多一次點解最好唔好用紙板嘛？」個設計師就講左一大輪野，解釋用紙板點解會同成個high fashion概念有所衝突。跟住Cohen又同佢傾左幾分鐘，問埋Ｄ無厘啦更野，等個設計師都唔記得佢問左乜。然後，佢又問佢：「你頭先話你今次個show咁成功係因為用紙板帶出左個主題，我超同意囉，用紙板呢個idea真係勁brilliant呀！」跟住個設計師就面有得色咁不斷解釋佢點解要用紙板。個重點係，個show根本就完全冇紙板。又有一次，Cohen呃另一個設計師既助手話佢搵唔到個設計師，問佢可唔可以扮係個設計師接受訪問，因為奧地利班觀眾「doesn't know shit」。個助手就話好啦，跟住就係咁講今次個show有乜深意想表達呀，點解要用海洋做主題呀咁。然後Cohen就搵返個設計師，問佢點解要用海洋做主題，個設計師就話佢個show根本就冇任何同海洋有關既野。Cohen追問佢：「少少都冇？」個設計師就答佢：「冇噃。」個設計師走左之後，Cohen就係咁捉Ｄ名人同模特兒訪問，同佢地講：「今次用海洋做主題真係勁正囉，嘩我超感動囉真係，我完全同個海洋感覺connect晒呀。你又有乜野感受呢？」跟住班名人同模特兒就係咁表示自己幾咁欣賞個海洋主題呀，係咁解釋點解用海洋做主題好有深度呀咁。當然，Cohen重問左好多其他野，先陰到班「時裝愛好者」露出馬腳，所以只有好留心記住佢問過Ｄ乜，先有辦法明白佢想揭示Ｄ乜野。

不過，大部份電影都唔係旨在揭示社會現實或者宣揚某種訊息，而係要呈現某一種感覺、某一種角度。正如金庸先生話齋：「宣揚某種想法並唔係小說家既責任。」好似《舒特拉的名單》咁，導演根本就唔係想話「二戰時德國人都有好人」，否則的話做個歷史學研究調查下當時有幾多德國人反對屠猶咪得囉，重有說服力添。當然，套電影可能都會帶出左呢個訊息，但帶出呢個訊息卻唔係拍呢套電影既目的。好多時候，拍電影就係想呈現個導演（或者編劇）睇某個現象既角度，或者帶出一種感覺，令觀眾可以響短短九十分鐘裡面進入電影世界，以導演既視覺體驗某現象。所以，要享受一齣愛情電影，觀眾首先要懂得點樣「入戲」。

所謂既「入戲」，就係要設身處地地以主角既角度感受個故事，或者將自己既情感同個電影故事連接起黎。所以，當我地見到個男主角為個女仔做左Ｄ好偉大既野，我地會忍唔住流淚，因為我地當左自己係個女主角，或者至少全情投入左響個故事當中。否則的話，個虛構既男主角患絕症而死，關我Q事唶？有乜好喊唶？

所以，當你響睇緊戲果陣講野，就代表你係處於完全抽離既狀態睇果套戲。你掛住分析Ｄ電影內容如何如何reinforce港女心態，Ｄ情節又如何如何犯駁，你又點入戲呢？你又有乜辦法領悟情節所帶畀你既果份感動？分析電影所帶出既訊息唔係唔可以，但呢樣野應該係睇完戲之後做既，而唔係睇緊戲果陣做。睇電影係一種經驗，而唔係一份功課。我問過唔少覺得韓國愛情電影係垃圾既高質港男，到底有冇試過響睇緊一套戲果陣喊，答案係否定既。

好多韓國愛情電影導演都只係想感動班觀眾，而唔係要表達某種好有深度既訊息，所以要評價呢類電影，應該以佢有冇感動到大部份觀眾為標準。因為佢內容冇深意而話佢垃圾，又同批評聖經唔好味有乜分別？又同批評《鹿鼎記》歌頌流氓有乜分別？而家到底係邊個唔識睇戲？

我份人好膚淺，對於歷史細節所知不多，但至少我睇《舒特拉的名單》果陣，我懂得感動。我唔敢話「入戲」係比較正確既睇戲方法，但至少我覺得我地Ｄ女仔有辦法以感性角度欣賞一部電影，都唔代表我地低能。

第四十二回：誓與明光共進退

小小琪：明光社真係超低能囉，夠薑話大衛像不雅都有喎。

乙：但大衛像係不雅喎。

小：Oh my god！你識唔識藝術架你呀？大衛像係米開朗基羅雕出黎架！

乙：係不雅就不雅架啦，邊個雕都冇相干格。

小：大衛像又有何不雅之處唶！

乙：佢露賓周喎。

小：點解露乜乜就事必係不雅呢？

乙：因為不雅既定義包括左所有同生殖器有關既野囉。

小：點解同生殖器有關就係不雅唶！哦，唔通你睇到大衛像會有性興奮牙？咁係你心理變態囉，我見到就冇感覺勒！

乙：淫審處話佢不雅唶，都冇話佢淫褻。

小：如果冇人會因為見到大衛像而興奮，咁做乜要禁止佢公開展覽呢？

乙：等等先，你意思係如果有人因為見到大衛像而性興奮，我地就有理由禁止佢公開展覽？

小：又唔係咁意思。咁呢個世上實有好多好似你咁既變態佬格，例如有Ｄ人見到死屍都可以興奮一餐格，咁唔通又要禁晒所有有死人既電影？梗係要普遍人都認同該事物會引起性興奮先有問題架啦！

乙：點解普遍人認同某事物會引起性興奮就有問題呢？

小：嘩，咁都冇問題？唔通龍虎豹又冇問題哪喎？四仔又冇問題哪喎？

乙：四仔有乜野問題呢？

小：又唔係話有問題，不過就要管一管咁囉，例如唔應該畀心智未成熟既細蚊仔睇。

乙：細蚊仔睇四仔又有乜問題呢？

小：佢地未有能力為性行為負責任囉！

乙：咁點先為之有能力為性行為負責任呢？

小：養得起個BB仔囉！

乙：咁好多大人做愛都唔係為左生BB格。

小：但假若佢地一個唔小心搞大左個肚，佢地都有能力養大個細路丫嘛！

乙：但如果佢地冇諗住生BB，佢地多數會落左佢架咋喎。

小：咁我都唔反對墮胎格，但至少佢地有能力選擇墮唔墮胎丫嘛！如果係細路女大左肚，佢就只能夠墮胎。

乙：咁講到尾你咪即係反對墮胎，否則的話細路女墮胎又有乜野問題唶。

小：墮胎會對女人心理造成陰影架！

乙：咁你咪即係反對墮胎。

小：係哪！我係反對墮胎哪！咁得未？

乙：未得。既然你反對墮胎，咁成年人墮胎你都應該反對格，咁係咪連成年人都唔應該睇四仔丫？

小：我都話成年人養得起BB仔咯！

乙：問題係佢地未必會選擇生佢出黎丫嘛。咁你點解唔乾脆反對墮胎，而要反對睇四仔唶？

小：等等先，而家係明光社反對睇四仔咋嘛，我都冇！

乙：你話細路仔睇左四仔會做愛，做愛有可能大肚，大肚就唯有落左佢丫嘛。

小：咁都係代表我反對細路仔睇四仔唶。

乙：唔係，你係反對細路仔落仔至真。因為照你既講法，細路睇四仔本身冇問題格，問題係佢有可能導致更多年青人偷嘗禁果然後墮胎丫嘛。

小：咁禁止佢地睇四仔咪可以解決呢個問題囉！

乙：但你既說法有兩個未經證實既前提。首先，你假定左睇四仔會導致班細路更想做愛；其次，你假定左墮胎有問題。

小：第二個前提係道德問題，邊有得證實架唶！例如無論係立法禁止也好，容許也好，所有有關毒品既法例原意都係想降低吸毒數字格，咁咪即係假定左吸毒唔好。但我地點證實吸毒真係唔好唶？對身體有害你都可以話冇問題格！

乙：我係覺得冇問題喎。有乜問題呀？

小：咁你講晒啦，咁唔洗立法啦，唔洗要警察啦，因為乜都可以冇問題！

乙：殺人同偷野之類既罪行會損害他人利益丫嘛，我覺得要立法規管喎，但吸毒同墮胎對其他人並無害處，所以我唔贊成要規管，請你分清楚。

小：但對Ｄ人自己有害丫嘛！

乙：咁你可以由教育著手格，你咪將你Ｄ大道理教畀佢地知囉，有得佢地自己衡量承唔承擔得起個後果囉。真係承擔唔起，都冇得怨人格，佢地自己揀架嘛。

小：咁直頭禁止佢地咁做咪得囉！

乙：但可能有人承擔得起個後果架嘛，例如可能有女人落仔冇hard feeling格，又例如可能有人食大麻生肺癌都可以處之泰然格。你立法禁止咪剝奪左佢地既自由？

小：咁法律不嬲都係為左保障大部份人既利益而犧牲少數人既權利架啦。

乙：所以你有數據支持大部份細路女墮完胎會唔開心呢個說法？

小：諗下都知啦，親手殺死左自己個BB仔喎？

乙：即係冇數據？

小：冇，但係我有理據，我既理據源自常識！

乙：咁其實我都相信大部份女仔會因為落過仔而耿耿於懷既，但又有冇可能佢地唔開心只係因為個社會話畀佢地知落過仔係應該唔開心架呢？

小：理得佢點解唶，問題係而家佢地真係會唔開心丫嘛，到左有朝一日大部份女仔都唔會因為落仔而唔開心，可能我會唔再反對落仔格。

乙：咁點解我地唔可以做Ｄ野令到呢個情況發生呢？例如可以宣傳落仔冇問題既訊息？

小：但落仔係有問題丫嘛！

乙：有乜野問題呢？

小：都話會令到佢地唔開心咯！

乙：……

小：呵呵，冇聲出哩？

乙：你點證明睇得四仔多Ｄ細路會更想做愛呢？

小：哦，咁你又衰左哪喎，我又真係有理據架喎。你唔知咩，好多心理學研究已經證實左細路睇完一樣野係會傾向想去試果樣野既！

乙：唔信。

小：呵！我啱啱帶左份資料響身，問你怕未。

乙：未怕。

小：睇你就睇啦！

乙：……

小：呵呵，冇聲出哩？

乙：份報告係證實左鍾意睇暴力電影既細路有更強烈既暴力傾向咋嘛，冇證實到係因為佢地睇左Ｄ電影所以有暴力傾向架喎。佢地可能係原本就有暴力傾向，所以先鍾意睇果類電影格。

小：咁呢份呢？佢地將一堆細路隨機分成兩組，一組睇天線得得B，另一組睇《古惑仔》；睇完《古惑仔》果組響之後玩玩具果陣明顯比較暴力喎！

乙：咁都可以係睇《古惑仔》果組原本就比較暴力格。

小：有可能，不過只有百分之一既可能性囉。喂，你識唔識統計學架？

乙：咁細路睇完四仔會扑野囉。

小：所以咪唔應該畀佢地睇囉！

乙：咁我睇得哪掛？

小：都唔係咁好既。

乙：又點解呢？

小：因為果Ｄ野cheap囉，冇深度囉。

乙：咁我睇大衛像得哪掛？

小：梗係得啦！

乙：但我睇完大衛像會想扑野喎，咁又同睇四仔有乜分別呢？

小：你睇完大衛像會想扑野？點解呀！

乙：你理得我唶。

小：但我反對你睇四仔都唔係因為你會想做果樣野，而係因為佢cheap丫嘛。

乙：如果四仔同大衛像一樣會令到某類人有性興奮，咁響本質上又有乜分別呢？

小：大衛像有深度Ｄ囉！

乙：咁點解四仔冇深度丫？

小：你要玩後現代咁你講乜都得格，你話龍虎豹有深度都得格，你話十隻白虎藝術性好高都得格。

乙：言則你反對後現代主義？

小：係喔，滿意未？

乙：你反對後現代主義，所以你覺得四仔冇深度；我支持後現代主義，所以我覺得四仔都可以有深度。既然呢個係主觀信仰問題，你憑乜野歧視我睇四仔呢？

小：如果你睇四仔真係因為覺得佢有深度，我唔反對喔。問題係我唔信你係以欣賞藝術既心態去睇四仔囉。

乙：其實點解一定要以欣賞藝術既心態去睇大衛像呢？我睇黎打飛機又得唔得？

小：得，你要膚淺冇人阻止到你格。

乙：點解打飛機就係膚淺呢？我睇黎打飛機都唔代表我唔可以同時理解佢既藝術含意格。

小：你其實想講乜唶？

乙：想揭示你同明光社其實冇乜分別囉。

小：痴線，我支持同性戀架！又點同班道德塔理班唶？

乙：你地取向唔同都可以邏輯一致格。

小：幾時有一致唶！

乙：我反對同性戀。

小：嘩，你有冇搞錯，你知唔知好多同性戀者都係與生俱來鍾意同性架？

乙：首先我唔覺得你有辦法證實任何野係與生俱來既，其次我反對同性戀都唔代表我反對為同性戀者爭取權益格。

小：咁同我係咪同明光社邏輯一致有乜野關係唶？

乙：冇關係格，同性戀係你講先既。

小：咁你講囉，我畀你講。

乙：你同佢地一樣覺得淫褻有問題囉。佢地話要禁止淫褻物品公開發售，係因為淫褻唔好；你地反對佢地既說法，係因為你地唔覺得佢地講果Ｄ野淫褻。亦即係話，你地其實認同淫褻物品有問題、應該被禁。

小：我地係覺得淫褻物品有問題，但我地反對立法禁止喎！所以我地根本就同明光社唔同，因為我地尊重出版同藝術自由。

乙：佢地都冇反對藝術自由喔，佢只係將某Ｄ野列為不雅或淫褻，要包膠套咋嘛。

小：佢地明明反對公開展覽有祼體成份既藝術品！

乙：咁都係一種反對意見唶，例如我反對同性戀，都唔代表我反對人類有同同性戀愛既自由格。

小：點同唶，佢地而家係反對果Ｄ藝術家展示藝術既自由丫嘛！

乙：佢冇唔畀你展示喔，佢地係覺得響公眾場合展示有少少不雅咋嘛。

小：呢個咪我地同佢既分別囉！我都覺得響公眾場合展示某Ｄ裸體雕塑有點兒不雅格，但我尊重佢地響公眾場合展示既自由丫嘛！我覺得反感我咪唔好行埋去睇囉！

乙：係囉，你都覺得不雅囉，咪同明光社一樣囉。

小：你做乜唶！都話佢地既提議係違反人權，而我地就正正係要爭取人權咯！佢地而家唔係話同性戀有問題，而係直頭想立法剝奪同性戀者既人權丫嘛！

乙：咁都係一種反對意見唶，你反對佢發表意見咪一樣剝奪左佢發表意見既權利。

小：喂我先至係港女喎，你唔好學我Ｄ邏輯喎！我而家係反對佢提議既野，而唔係反對佢發表意見既自由，唔該你分清楚！

乙：咪一樣係反對。

小：你做乜唶！做乜咁作賤自己唶！

乙：冇喔，明光社好丫，明光社妙喔。

小：你做乜係都要撐佢班粉腸唶！

乙：陳士齊響浸大教左十七年神學，都重係合約制講師仔，就係因為唔肯埋班教授堆歸信明光社。關啟文明明係佢師弟，又遲過佢入浸大，但而家已經做到副教授。

小：嘩，即係點呀，怕搵唔到食咁話哪喎！投誠咁話哪喎！關啟文個死肥仔寫過本野話自己駁倒左李天命Ｄ分析哲學架，佢反對家暴條例修訂法案架，佢話香港人唔需要普選架！你諗住擦呢條仆街鞋？

乙：打工係咁架啦，好多人都唔鍾意老細格，咪一樣要扮狗。

小：畀少少骨氣好唔好，搵唔到食咪搵唔到食囉，我養你！

乙：你就話唶，我女朋友話要LV架。

奪命追魂

本小姐唔鍾意聽電話，就如同我唔鍾意食日本野一樣，唔鍾意就係唔鍾意，唔需要畀任何人理由。電話響起既時期，冇心情同人傾計，或者忙住做緊其他野，所以唔聽電話，係最合情合理既事。可惜，世間上就係有種人會認為你唔聽電話係史上最罪大惡極既行為。果種人，正正係你條仔。

條仔打電話畀你，但又冇乜特別野要講，通常都係講下東又講下西，問你做過Ｄ乜，又打算做Ｄ乜，又講下自己做過Ｄ乜，又打算做Ｄ乜，直至大家都無話可說。就好似同Ｄ所謂既朋友玩MSN咁，同條仔傾電話根本就係一種宣稱彼此關係仍然良好既儀式，係冇乜實際作用既，係可有可無既。當然，有時你會係想同條仔傾電話果個，但當你唔想傾既時候，你就有權唔接電話，因為你有比傾電話更重要既野要做－－又或者更直接了當地講，你根本唔想接電話。唔想接電話就唔接，係好正常既事，條仔係愛你的話就唔會迫你做你唔想做既事。可惜低低ＢＢ既港男永遠佔大多數，佢地明知你唔想接電話，明知你唔鍾意，卻偏偏要好似癲左咁狂打畀你，直至聽到你厭惡既聲音，都重要苦苦追問你點解唔接電話呀，係咪同其他男仔一齊呀，係咪唔愛我哪，最後就係都要聽到個明知係藉口既藉口先肯收線，先訓得著覺。

有時候條仔打畀你，係真係有緊要野同你講，但呢種情況出現既機會率有幾高，大家心知肚明。條仔打畀你總有一Ｄ有趣得意既理由，例如想聽下你把死人聲咁。但小女子自問聲線既不甜美亦不動聽，我又唔係「好多囡囡等住陪你玩」既接線生，我當然有權選擇唔接電話。又有時條仔會話好掛住你，但你掛咪掛囉，唔係搵把口講架嘛白痴。最煩死人既理由係佢想知你做緊Ｄ乜，同邊個人一齊呀，跟住你打算去邊呀，幾時返屋企呀咁。好勒，當你死死地氣話畀佢知你跟住會同班姊妹去唱K啦，佢又肯定會再打黎睇下你係咪真係唱緊K，問下你點解咁靜既，係咪真係唱緊K架，又同邊個唱K呀，有冇男仔架，個男仔靚唔靚仔架有冇女朋友架，你又有冇飲酒呀，洗唔洗我黎陪你呀……

其實打電話畀另一半，係一種情難自制既舉動，想打就打，同樣唔洗畀乜野理由。不過打電話果個有時間傾電話唶，聽果個未必有心情同你傾架嘛。對方冇心情同你傾，你應該體諒，而唔係責備，否則一生人流流長點過呢？

而我本人唔鍾意聽電話，其實重有其他理由，個理由就係個電話係我買既，所以我鍾意幾時用我部電話係我既自由。當我唔接電話既時候，就代表我唔想使用我自己畀錢買既電話，你告我唔入，亦咬我唔食。我得閒的話，自然有可能打返畀你，但亦唔一定打，至於實際上點解唔打，其實係咪真係要我講唶？長大啦港男。

第四十一回：無理取鬧

小小琪：燒肉飯。

收銀員：冇燒肉飯喎。

小：但我見到燒味部明明有燒肉喎？

收：冇燒肉飯。

小：平時你地美心都有格，點解而家冇？

收：冇得散叫燒肉飯，要叫就叫龍蝦燒肉飯。

小：但我唔想食龍蝦喎。

收：要燒肉就要叫龍蝦燒肉飯！

小：但平時我去你其他美心分店都可以就咁叫燒肉飯架喎，點解呢度唔得？

收：要燒肉就要叫龍蝦燒肉飯！

小：我話其他分店有，問你呢間點解冇喎？

收：要燒肉就要叫龍蝦燒肉飯！

小：好哪好哪，咁我要一個龍蝦燒肉飯走龍蝦，得未？

收：要燒肉就要叫龍蝦燒肉飯！

小：我照畀返龍蝦燒肉飯個價錢囉，不過叫你走龍蝦咋嘛，你地冇蝕底架喎。

收：要燒肉就要叫龍蝦燒肉飯！

經理：咩事？

小：我想食燒肉飯，呢位收銀姐姐話冇。

經：唔好意思，我地冇淨燒肉飯架喎。一係你叫龍蝦燒肉飯丫？

小：我唔介意畀錢叫龍蝦燒肉飯，但我真係唔想食龍蝦，可唔可以叫師傅走龍蝦淨係落燒肉？

經：咁唔啱規矩喎……

小：唉，是但勒，咁可唔可以叫師傅將Ｄ龍蝦分開上？

經：咁當然可以啦。阿銀，同佢落單啦！

收：係。小姐，一個龍蝦燒肉飯，係咪？

小：係呀，不過你寫明龍蝦分開上喎，唔該。

收：多謝你八十八個八。

小：響美心快餐食個燒肉飯要八十幾蚊……唉，是但勒。

廚師：係，要Ｄ乜野？

小：一個龍蝦燒肉飯，龍蝦分開上。

廚：一個龍蝦燒肉飯，好。

小：……

廚：切切切。

小：喂，我都話龍蝦分開上咯，你做乜重要擺Ｄ龍蝦上Ｄ飯度唶！

廚：咩呀！即係點呀！

小：我叫你另外搵個碟裝Ｄ龍蝦呀。

廚：咩呀！咩事先！咩野唔啱先！

經：喂，重新做過啦，搵過個碟裝Ｄ龍蝦啦。

廚：咩呀！即係點先！

經：都話搵過個碟裝Ｄ龍蝦咯。

廚：嘖！

經：……

廚：切切切。

經：……

廚：係咪咁呀！

小：喂，你而家咩態度呀？你叫咩名，我要投訴你。

廚：做乜要話個名你知呀！

小：都話我要投訴你咯！

廚：你好走哪，我打撚死你架！

小：你咁樣對個客人講野？唔得，等我拍低段片放上Youtube先。

廚：叫咩名關你撚事咩，傻架你！

小：唔係我傻，係你失禮咋你響度做。

乙：咩事呀？

小：老公，你黎得啱哪，我叫佢龍蝦分開上，佢話要打撚死我喎。

乙：搞錯呀，對個客人講粗口，有冇禮貌架你呀？

廚：唔好意思囉。

小：唔好意思大晒牙？我而家要投訴你呀。

經：喂，你放工先啦。

廚：哦……

小：喂，你唔好畀佢走住呀，我而家要投訴佢呀，佢話要打撚死我喎，我問佢叫乜名，佢又話「關你撚事咩」咁！

經：你係咪講過Ｄ咁既野？

廚：係……

經：你有冇搞錯呀？你聽日唔洗返工哪！

廚：嘖，死八婆……

小：你講乜野呀？好，我而家就將段片擺上網，等大家評下理！

小：……

小：搞掂！

小：睇下Ｄ網友既留言先。

留言Ａ：不知所謂！唔係話個師傅呀，係話你依個死仆街正八婆呀！麻撚煩，又撚臭串，如果我果日響現場，一定大巴大巴咁車撚死你！

留言Ｂ：好可惡！真看不過眼！唔好以為咁係好威啦，八婆！俾你咁bitch barking後，搞到人地冇左份工！

留言Ｃ：死八婆，食撚屎啦！

留言Ｄ：又係港女，不撚知所謂！

留言Ｅ：有冇好心人有呢條死臭西張相呀？唔該快Ｄpost上來啦！等全港食肆列呢條死臭西入黑名單，以後呢條死臭西想出街食飯都幾撚難！

留言Ｆ：明眼人都知呢件死八婆臭西響度搞事啦！都唔明美心點解會無啦啦炒左人！呢Ｄ敗類係要累到人地無左飯碗先安樂！因住風水輪流轉，下次輪到呢條死臭西呀！

留言Ｇ：希望條八婆身邊既人、憎佢既人公開佢張相比大家睇，同佢搞個特輯，改埋個標題：「男人人版就係陳健康，港女人版就一定係你哪！」

留言Ｈ：貪錢戇尻爛臭西！

留言Ｉ：人在做，天在看！有計劃有預謀地令到人地份工冇左，你條打靶睇住行路仆街死呀！

留言Ｊ：個廚真係俾人炒左呀？冇天理啦簡直！成件事由頭到尾都係條港女唔岩囉，係度搞住晒，唯恐天下不亂，正仆街！

留言Ｋ：呢條八婆真係害人不淺，正仆街，唔撚係人來的！現在Ｄ友時時講乜顧客至上，但人始終是人，冇可能乜都忍到，請這些零售集團炒人要諗清楚！你條八婆如果真係令人冇左份工，你真係唔死都無用，正仆街！

留言Ｌ：仆街港女玩野，自己講粗口話人，都唔知佢咩野，重話上Youtube，自己俾人屌撚到仆街，冇撚腦，正宗港女風格，佢地永遠無錯，人地可能一家大細要養，佢咁做又係意氣之爭，真正港女，戇尻加無品！

留言Ｍ：咁多網友替阿叔不值，為乜？不外乎「公道」兩隻字。我地同阿叔非親非故，同妳亦無十怨九仇，大家都係憑良心講野，對事唔對人。

留言Ｎ：唔好比我估中，梗係你條死仆街太bitchy，先激到人地對你服務差！想要咩服務呀？咁撚巴閉咪唔好去美心，去大酒店度食丫笨！

小：哇哇哇哇哇！

乙：做乜爆喊呀？

小：Ｄ留言囉，搞到我好痛苦呀！我想死呀！

乙：唉，傻既，人地講乜咪有得人地囉，唔好擺響個心啦。

小：幾萬個留言鬧我死八婆喎，我點唔擺響個心呀？

乙：算啦，可能佢地太有同情心，見個廚俾人炒左，咪下意識企響佢果便囉。

小：有同情心？佢地咁樣鬧我都算有同情心？

乙：佢地淨係睇到你鬧個廚師果段片，唔知前因後果丫嘛。

小：唔知前因後果就唔好下定論啦！重話乜野「如果個港女好態度個師父就唔會講粗口話佢」，咁咪即係誅心論！點解佢地唔可以調返轉諗，如果個師傅好態度我就唔會咁鬧佢呢？Ｄ人分明係一見到我係女仔就認定係我錯晒！

乙：咁你Ｄ港女而家勢弱，係要忍讓下架哪。

小：咁咪即係對人不對事！點解幾萬個網民冇一個講道理架唶？

乙：咁佢地覺得你去快餐店食野唔應該咁多要求丫嘛。

小：係佢地話可以龍蝦分開上既！其實點解唔可以賣淨燒肉飯唶？你咪照收返龍蝦燒肉飯個價錢囉，根本就係佢地唔識做生意。

乙：Ｄ網民唔係睇呢Ｄ野架嘛。

小：我知，佢地睇態度丫嘛，但我態度點差都差唔過個廚師搵粗口鬧個食客啦下話？

乙：但個廚師唔係港女丫嘛。

小：啊啊啊啊啊！我好想死呀，香港都民智未開既，個個都好似禽獸咁毫無理性！

乙：唔好死，你死左佢地咪心涼囉。

小：都痴線架！Ｄ香港人重有冇人性架？

乙：可能有人性、覺得你啱果種人唔習慣響Youtube留言呢？

小：我唔理！好，我而家就走去跳樓死左佢，睇下班網民訓唔訓得著覺！

乙：何必呢？公道自在人心，你知道自己啱咪得囉。

小：喂，你到底幫邊個架唶？

乙：其實燒肉飯週圍都有，點解你係都要響美心食？

秋甜

「終於等到中秋節，回來共對也無言。收起相思的花串，茫然淚已到唇邊。是否每個說愛的故事，都會永遠留下片斷？千千燈影裡，低聲輕輕說，但願熱情未變。」

這是黃秋生個人專輯裡的非派台作品《秋甜》，曲詞皆由秋生一人包辦，旋律很簡單舒服，歌詞營造的意境也很動人，是一首我頗喜歡的曲子。事實上，秋生首兩張專輯《支離疏》及《地踎搖滾》內的所有歌曲，均從未正式派台，但由於市面反應異常熱烈，商業電台還是於九五年頒了個「叱咤樂壇新力軍男歌手金獎」給他，與女新人陳慧琳平分秋色。事隔十四年，現在年青的一代只怕不知道黃秋生也會唱歌吧。就算知道，也未必有興緻下載試聽，因為那不過是老很土的搖滾樂。現在的大熱作品，其實清一色都是流行曲，就連謝霆鋒也不再《活著viva》了。

可是，當年秋生的作品遭到全面封殺，卻不是因為那是搖滾樂，亦非因為部份歌曲含有髒話，而是因為歌詞內容實在太過敏感。其實擁有一半英國血統的秋生，早於學生時代便已開始組團玩音樂，但也只是玩票性質。一直到了香港回歸前兩年，他才終於一口氣推出上述兩張專輯，大概是怕回歸後才發表這類作品會惹麻煩吧。秋生的歌曲，以諷刺時弊為主，其中一些矛頭直指中共政權的作品，歌詞比Beyond《繼續革命》裡的《長城》還要露骨，例如不含半句髒話的《雷公劈友除世害》，就有以下一段歌詞：「鄉下細路冇書讀，學校爛到塌落地；首都高官挖私利，億元落袋遠處飛。農村失收冇飯食，都會夜夜笙歌；城市炒賣玩暴發，幹部狂噬刷爆咭。呢頭話落後，要人鎮災救濟嫌唔夠；果頭扮進步，Cheap租火箭甩繩馬騮。一面話開放，拉人坐監審完無理講；一面話改革，翻黎覆去越搞越猖狂……」

由此可見，秋生並不是以「唱粗口歌」為主的，事實上，他兩張專輯裡的二十二首作品，只有僅僅四首含有髒話（包括《地踎搖滾》、《吓》、《支離疏》及《阿門》。《無能用者》的「能」字，嚴格來說不算髒話。）尤其是以諷刺政治為題的作品，例如《莫須有》及《實在無法睡眠》等等，更是清一色不含粗口。不過，當年我們一群同學最喜歡的，卻要數劉以達作曲、「劉以達官立小學」編曲的《盲毛》，可能那時候我們還不太關心政治吧。當時，我們只覺得「懶理人人著晒龍袍，我卻仍然訓馬路」之類的歌詞很有趣，現在長大後重新品味，才體會到箇中意思。

還記得，那時候用CD機聽這兩張唱片，都經常跳過內裡的抒情作品。也不是小時候的我不愛情歌，只是我跟很多人一樣，聽黃秋生實在不是為了聽情歌。長大後，由於香港搖滾樂已一命嗚呼，有時候想聽聽人們以廣東話嘶吼，便唯有拿秋生的這兩張專輯作伴。這才發現，原來秋生的抒情作品也很不錯，例如《飛天婆婆》與《習作九月二號》，又例如上述的《秋甜》。

在沒有言論自由的環境下生活，人們不止沒有公開批判政府的自由，更沒有創作藝術的自由。八九年有份參與「民主歌聲獻中華」的演藝界人士，現在為了北上挖金，已紛紛向中共獻媚投誠。一些當年叫得最聲嘶力竭的演藝界老大哥，事隔二十年，甚至能厚著臉皮地說：「入屋叫人，入廟拜神，你到人家的地方播電影，當然不能播一些得罪人家的電影啦！……就好像你進入人家的屋子要脫鞋，你進軍大陸市場當然要過濾敏感題材啦！這是尊重人家的表現。」所以，就連當年夠膽以一名倒吊在大樹上的小孩諷刺世界黑白顛倒的張藝謀，現在也只得來一場「洗太平地」暗頌心曲。除演藝界外，一些在內地頗有名氣的香港文化人，也為了保住飯碗及僅有的言論空間，而不敢在內地發表任何題材敏感的散文演說。一直堅持不肯妥協求存、決意放棄大陸市場的藝人，只有梅豔芳和Beyond，可惜前者已經死了，後者的靈魂人物王家駒亦已離開。

當然，在「一國兩制」下的香港，想要發表敏感言論或藝術作品，還是可以的。只是，這種藝術作品能否在主流市場上佔一席位，卻是再明顯不過的事。

今天是中秋節，描寫中秋的樂曲並不多，所以唯有找回秋生那首《秋甜》應節。還記得，為了讓《無間道》能在內地上映，導演被迫另外製作了一個「惡人有惡報」的「海外版」。該版本質素如何，實在無謂多講，據稱有份主演這部電影的秋生，也在私底下批評過這版本「不知所謂」。可是，他卻沒有反對導演改動電影結局。眼見心愛的作品被強姦，他選擇了默不作聲、袖手旁觀。

《秋甜》講述的，主要是從前美好的時光，現在已成過去。聽著這首曲子，我思念的除了一個愛的故事，還有那昔日的香港。

女人，你了解幾多？

好多時候，我地Ｄ女仔對男朋友作出批評，並唔係想挑起一場論戰，而只係想單純地批評一下你地既行為，甚至只係想扭下計等你Ｄ男仔氹下我地，錫錫我地。如果你唔理我既出發點，死都要去反駁我的話，就會令到我好唔開心囉，因為我根本就唔係想同你拗Ｄ乜。

有次我男朋友笑我唔關心政治，咁我就嘟起個嘴仔同佢講啦：「你又唔係第一日識我，我不嬲都對呢Ｄ野冇興趣架啦，你都唔了解我既！」我咁講，只係想批評佢笑我唔關心政治呢個行為，而唔係想探討佢究竟係咪真係唔了解我，點知佢就好鬼認真咁同我講：「如果我唔了解你，就唔會話你唔關心政治啦！你自己都認左你唔關心政治啦！咁我而家知你唔關心政治，咪證明左我好了解你囉，點解你Ｄ港女講野係都要冇黎邏輯架唶！」嘩，佢唔氹返我不特止，重要咁樣黎奚落我，咁我梗係火都黎啦，咪同佢拗過囉：「你追我果陣已經知我係咁架啦！你咁唔滿意自己女朋友唔關心政治，你當初又追我？」「咁你有缺點我都可以鍾意你格，但唔代表你冇必要改架喎！」「對政治冇興趣算乜野缺點唶？人人都有自己個人喜好架啦，點解人地唔鍾意你鍾意既野就算係錯先？」「喂，關心政治係公民責任黎架，香港就係有你Ｄ咁既人，中聯辦先會有藉口話普選時機未成熟！」「喂，咁關心女朋友夠係男人既責任啦，你成日都唔肯打畀我，你都唔關心我既！」「喂小姐呀，我已經一日打三次畀你啦，咁都算少？況且就算我唔打畀你，都唔代表我唔關心你格，關唔關心唔係睇呢Ｄ野架嘛！」跟住我同佢愈扯就愈遠，由於著眼點有所不同，所以根本討論唔出個乜野名堂黎。佢根本就唔明，我話佢唔關心我，唔係真係覺得佢唔緊我，而係想佢打多Ｄ電話畀我唶。我想佢打多Ｄ畀我，其實係愛佢既表現，畀著係第二個打畀我呀我都唔想聽啦！佢唔為左我著緊佢而錫返我，反而死都要爭辯落去，咁有乜謂唶？做乜死都要拗贏我先安樂唶？係，我表面上係響度話你，但實際上我都唔係想你難受，而係想你關心我多Ｄ咋嘛！你錫返我一啖話以後會打多Ｄ畀我咪得囉！

所以，響我話你既時候，唔該你唔好玩埋Ｄ理性分析住，而應該睇下我點解要話你。如果你覺得自己冇唔關心我，咁我又點解要話你唔關心我呢？如果你自問已經好了解我，咁我又點解會話你唔了解我呢？好簡單，因為你真係唔了解我，因為你唔知道我想講既根本就唔係果Ｄ野。你唔知道點做先可以令我開心，咁算乜野了解我呢？又如果你知道點做可以令我開心，但就偏偏唔做，咁重算乜野關心我對我好呢？由此可見，講野冇黎邏輯自相衝突果個根本就唔係我，而係你。

咁你可能會話，既然我都唔了解你，咁我要點先知你心裡面實際上諗既係乜呢？係咪要變做你肚裡面條蟲至得呢？咁又唔洗話變條蟲咁複雜，其實你好態度Ｄ問下我咪得囉，例如可以笑住直接問清楚我：「你其實只係單純想我打多Ｄ畀你，定還是真係覺得我唔關心你呢？」最好就自己醒目補多句：「其實我好關心你架，只係真係唔鍾意成日傾電話，不過如果你鍾意傾，我以後好樂意打多Ｄ畀你既，因為你開心係最重要。」拿，如果你識咁講，我一定甜到入心啦，重分分鐘會叫你唔洗打咁多畀我添，因為我最主要係想你氹下我，畀Ｄ安全感我咋嘛。我想你畀安全感我，係因為我鍾意你，如果你真係了解我，知道我係咁諗，你應該開心先係架，點解係都要拗餐懵先至安樂唶？

近排轟動全城既「七折港女」事件，就正正係男人唔了解女人既典型例子。話說有個女仔用三百五十蚊響旺角買左個臉盆，點知有日響上水分店發現佢標價貴過旺角喎，咁咪同個店長講囉。個女仔指出兩間分店標價唔同，都係想據理力爭，路見不平唶，點知個店長就死唔認錯，話其實係旺角分店標低左個價錢。喂，就算真係你其他分店標錯價錢呀，都係你地公司錯丫，咁有錯係咪好應該認呀？你知唔知乜野係待客之道呀？個店長就係唔明白，個女仔根本就唔係想再買多個臉盆（因為佢已經買左），更加唔係想叫對方賠錢（因為佢其實係買平左至真），而只係想指出對方有錯，想指出呢個錯誤對其他響上水買左個臉盆既人唔公平，因為如果佢地去旺角買就會平十幾蚊。呢個邏輯，我覺得好合理囉，點知網上面以男人為首既過千網民竟然一齊聲討呢個女仔，重將佢Ｄ個人資料擺晒上網，我覺得真係非常過份囉。其實，個女仔明明係呢件事既得益者，都重要企出黎同對方理論，都已經算係俠義心腸啦，你班男人洗唔洗咁樣黎折磨人呀？佢到底做錯左Ｄ乜唶？佢出發點有乜野問題先？

網上面Ｄ臭男人鬧黎鬧去，就係鬧個女仔態度唔好。但咁咪即係人身攻擊！態度好唔好同有冇理據有乜野關係呀？所以話你Ｄ男人唔了解女人囉，我地女仔唔開心果陣呀，係會發脾氣架。就好似我地話你唔了解我地呀唔關心我地呀果陣，態度都唔係好格，咁你氹返我地咪得囉，唔通我次次發脾氣你都要同我理論？咁咪會搞到日日都拗幾次交？

相處之道在乎包容體諒。要你地忍讓下自己心愛既女朋友，好難咩？點解你地係都要咁自私，淨係識顧及自己感受先？

第四十回：迷

小小琪：啱啱睇完套《Fame》，嘩，Ｄ歌舞超華麗囉，勁正呀！

乙：商業野黎唶，都冇深度既。

小：喂，你唔鍾意咪唔好睇囉，自己睇唔明就話人冇深度，有冇搞錯呀！

乙：乜野睇唔明唶，歌舞片黎咋嘛，頂多咪話唔係個個都可以做到職業藝人，有野想講唔代表有深度架喎。

小：喂，咁歌舞片係咁架啦，唔通係要好似《Inglorious Basterds》咁唔知講乜先叫好電影牙？

乙：《Inglorious Basterds》係cult片黎咋嘛，唔難明架喎。

小：我覺得拍得好差囉！希特拉明明係自殺死既，個導演就話係俾班恐怖份子燒死，有冇離譜Ｄ添呀？重有呀，佢講到Ｄ納粹軍人咁有理性，我覺得同現實有好大出入囉！

乙：搞錯呀，果班都唔係恐怖份子，你識唔識睇戲架。

小：咁樣燒死班德國人都唔係恐怖份子？咁你講晒啦！

乙：你連套戲既內容都get唔到，都唔知點同你討論中心思想。

小：乜野get唔到唶？哦，淨係你既理解先至係正確既理解哪喎，其他人有不同意見就係唔識睇戲哪喎，你有冇思想封閉左少少呀？

乙：感想可以係主觀，但電影內容係客觀架喎，你而家係唔明佢講左Ｄ乜喎，唔係唔明佢想表達Ｄ乜喎。

小：咁佢想表達Ｄ乜野咁巴之閉呀？

乙：冇乜特別野想表達架喎，昆丁塔倫天奴想玩野咋嘛，反傳統咋嘛，頂多咪寸下其他電影人唔敢殺希特拉、唔敢拍盟軍好似納粹燒死猶太人咁燒死晒Ｄ德國人。

小：你自己唔鍾意既電影就唔係好電影，咁都唔叫主觀？唔啱你講套你覺得有深度既戲出黎睇下有幾巴閉勒！

乙：我覺得《The Curious Case of Benjamin Button》幾有深度丫。

小：咁我都覺得呢套野幾好睇，段愛情拍得好唯美，唯獨是個結局差左少少囉，我唔鍾意。

乙：下，佢唔係愛情電影黎架喎，你到底睇唔睇得明架。

小：《Benjamin Button》唔係愛情電影？係你識唔識睇戲至真呀！

乙：唉，唔洗問阿貴，你實覺得《Bridget Jones’s Diary》好鬼正都得啦。

小：喂，《Bridget Jones’s Diary》係好正喎，至少個結局收得靚先啦，你唔識睇就唔好學人畀意見啦！

乙：點解我覺得佢唔正就一定代表我唔識睇戲呢？

小：因為佢事實上係好正囉！

乙：呢Ｄ咁既chick flick，套套都講一堆高質男人瘋狂愛上個冇黎吸引力既女主角，等Ｄ女觀眾精神自瀆一番，同AV有乜分別唶。

小：咁果Ｄ乜野《American Pie》呀《變形金剛》呀咪一樣講Ｄ索到爆既靚女愛上個薯仔男主角！咪一樣係畀Ｄ男觀眾精神自瀆！

乙：所以我冇話果兩套戲有深度囉。

小：冇深度咪冇深度囉！日本四仔都冇深度格，你Ｄ男人又睇？

乙：冇深度都可以有實用價值格，例如我都好鍾意《American Pie》格，可以輕鬆下笑下咁幾好丫。

小：咁你就唔好話Ｄ鍾意睇《Bridget Jones’s Diary》既人唔識睇戲啦！

乙：我冇話鍾意睇果套野既人一定唔識睇戲喔，我係話以為佢有深度果Ｄ人唔識睇戲咋嘛。

小：你呢挺懶有深度既男人，實以唔睇TVB劇為榮都得啦！

乙：唔係喎，我得閒都有睇下港劇格，之前套《學警狙擊》幾好睇丫，娛樂性豐富，劇情又夠緊湊。

小：超，你自己都睇港劇啦，咁你憑乜野話人《Bridget Jones’s Diary》冇深度唶？

乙：但我冇話過港劇有深度喎。

小：你Ｄ崇洋媚外既死漢奸，實覺得人地美國Ｄ劇集有深度得多啦！

乙：咁人地美劇又真係有深度得多喎。

小：超，點解你係要以為人地外國個月亮特別圓架唶？果Ｄ乜鬼野《Sex and the City》呀《Desperate Housewives》呀咪一樣係chick flick，一樣係商業野！

乙：《Desperate Housewives》唔算係chick flick黎架喎，頂多都算係「師奶flick」唶，況且佢地Ｄ劇集商業極都有Ｄ深度丫，例如《Desperate Housewives》就描繪左美國郊區Ｄ主婦既心態，唔係一味娛樂架喎。

小：咁《溏心風暴》夠唔係一味娛樂洛，有好多情節都好傷心架，喊濕我好多包紙巾架。

乙：但搞到你喊濕好多包紙巾正正係佢既娛樂性之一喎。

小：搞錯呀，你見到女仔喊都覺得開心？你簡直係世紀賤男呀！

乙：何謂世紀賤男呢？

小：本世紀最賤既男人囉。

乙：咁你之前又話倪震係世紀賤男？到底邊個賤Ｄ呀？

小：咁我份人好公道既，梗係倪震賤Ｄ啦。

乙：咁我咪唔係世紀賤男囉。

小：《Lost》是一套極正的劇集。

乙：車，基督教propaganda黎唶。

小：你講乜野呀，我話《迷》喎，果套美劇喎？

乙：我知喔。喂，套野好明顯響度宣傳緊基督教思想喎，你唔係睇唔出下話？

小：痴線，呢套野分明係科幻劇集黎啦，幾時有宣傳基督教思想呀？

乙：聽個名都知啦，「Lost」喎，擺到明係想講一班lost左faith既人點樣搵返信仰啦。

小：痴線，你識唔識英文架？「Lost」都可以解「失蹤」架嘛！

乙：班主角Ｄ名都夠明顯啦，John喎，James喎，Joshua喎？

小：痴線，呢Ｄ名響美國都不知幾普遍，唔通套套主角叫阿John既都係基督教電影牙？

乙：咁重有好多其他野架嘛。拿，果對搞亂倫既兄妹兩個都意外身亡，個妹重要係同Sayid發生婚前性行為之後即刻死添；殺人唔眨眼既Ana Lucia就更加唔洗講啦，又係一同Sawyer搞野就即刻俾Michael射死。你覺得佢想表達Ｄ乜呢？

小：但個牧師咪一樣死左！

乙：佢係大毒梟黎架喎。

小：Charlie都死左格！

乙：佢吸毒兼玩邪惡音樂丫嘛。

小：咁都唔代表套野同基督教有關格！

乙：咁唔止呢Ｄ架嘛。拿，島上面有faith既人，次次都啱既，例如個黑人女人堅信佢老公未死，個個都以為佢痴線，但最後佢老公真係未死喎；又例如阿John次次堅持既野，好似一定要禁果個掣呀、唔應該同架搜尋船聯絡呀，最後都turn out係啱既。反觀阿Jack乜都講邏輯講科學，咪次次都錯囉，導演重專登portrait到佢鬼死咁盲塞添，分明想暗喻Ｄ自以為科學可以證明一切既人思想封閉。

小：咁都得？但阿Jack都唔係次次錯格，佢話要返番個島咪turn out係啱架囉！

乙：係喔，但佢最後堅持要返番個島咪正正係faith囉，佢都唔知點解要返去格，佢淨係信佢地應該返去咋嘛。

小：佢錯你話係基督教思想，佢啱你又話係基督教思想，咁你講晒啦！

乙：但佢錯親都係因為信心唔夠丫嘛，最後佢開始有faith咪終於啱囉，導演就正正係想呈現阿Jack呢隻迷途羔羊慢慢開始有faith既過程。喂，其實真係好明顯啦，又起教堂又聖母像，咁你都睇唔出？

小：講下講下又好似係喎，阿John跛左可以行得返，個黑人女人既癌症突然痊癒，阿Jack老豆死後復活，全部都係傳統基督教既神蹟黎既！等等，阿Jack老豆重係叫「Christian」添！

乙：阿Jack直頭姓「Shephard」添，牧羊人喎，問你怕未。

小：唔怪之得佢地成日響度討論「miracle」啦！

乙：個牧師直頭叫阿John「Don’t mistake coincidence for fate」添，擺到明想講所有野冥冥中自有主宰啦。

小：頂，唔怪之得佢地個個響現實世界都有關聯啦，原來一切都係神既巧妙安排！

乙：所以我真係覺得呢套野拍得唔錯，所有情節都有其深意，比《X-file》直接安排Scully走入教堂重拾信仰高章得多。

小：嘩，唔得，等我返屋企認真睇多次先得！

乙：下，又話去睇《Love Happens》既？

小：Ｄ冇黎深度既chick flick重睇黎做乜？

乙：你終於有興趣認真解讀一部電影，好事黎既，咁走囉。

小：埋單唔該！

？：……

？：……

？：喂，Libby，頭先果兩個人講緊我地套劇集喎。

Libby：係囉，Kate，估唔到連中國人都會睇我地套野喎。

Kate：係呢，上次本八卦雜誌訪問你，篇報導出左街未？

Libby：啱啱出左啦，我咁橋有本響度，借你睇下勒。

Kate：嘩，Ｄ相又影得幾靚喎，邊個渣機呀？

Libby：阿Luke囉，嘩估唔到佢真人都幾靚仔喎，重好風趣添。

Kate：阿Luke！

Libby：做咩呀？

Kate：冇乜野，不過人地靚仔還靚仔，你千祈唔好同佢行埋喎。

Libby：下，點解呀？我地行埋左哪喎，重約左今晚再見面添。

Kate：Oh my God！你知唔知佢搞過我地編劇個老婆架？

Libby：下！唔……唔係下話？死哪，我尋日重響片廠週圍同人講我同阿Luke出街添！

Kate：你唔係下話？咁編劇實知道都得啦！

James：Hello，freckle，等左好耐牙？

Kate：你咁遲既，又話一拍完就趕過黎？

James：編劇叫我攞埋Ｄ劇本畀你地丫嘛。

Libby：唔該！

Kate：等我睇下先。

Libby：……

Kate：……

Libby：！

Kate：！

James：嗯？做咩呀？

Libby：搞……搞錯呀，我下集要無端端畀Michael射死？咁樣冇頭冇尾都得？都……都未解釋我同Hurley響同一間精神病院住過果件事！點解要整死我？點解要整死我呀？

James：你唔係以為我唔介紹兩件model畀編劇識會有得同最索果三個女主角上床又唔洗死下話？

反二十三條立法：堅持叛國行為不違法？

香港的二十三條至今仍未立法通過，實在是教不少中國同胞難以理解的事情。二十三條主要是針對叛國罪、煽動叛亂罪、竊取國家機密罪、顛覆國家罪及分裂國家罪所擬定的憲法，這種以維護國家安全為宗旨的法例，很多西方先進國家也有訂立，所以根本不是甚麼違反人權的「惡法」。香港人反對二十三條立法，乃又一逢中必反的事例，否則把「叛國」訂為違法行為，又有何抵觸一國兩制之處？難道香港人認為叛國並無不妥？一水之隔的澳門特區，就沒有發生此等莫名其妙的鬧劇，澳門人甚至強烈反對香港政客赴澳阻止國安法的立法，反映澳門同胞比香港人更為理性，更明白保障國家安全利益的必要。

「莫須有」乃中華民族傳統法治體制不可或缺的條例，否則秦檜憑甚麼懲辦誓要破壞與鄰近地區友好關係的岳飛？否則宇文贇憑甚麼處死公然議論弊政擾亂社會穩定的烏丸軌？當今中共王朝之所以金槍不倒穩若泰山，靠的正是這條莫須有式的國家安全法。劉曉波爭取中國憲法明文保障的民主人權，那是「煽動顛覆國家政權罪」；陳道軍反對興建污染環境的石化工程，那是「煽動分裂國家罪」；黃琦揭發四川多間小學承建商偷工減料以致地震時校舍倒塌壓死學生，那是「涉露國家機密罪」。否則的話，我們又憑甚麼控告這些唯恐天下不亂的滋事份子？難道要告他們維護人權、保護環境、打擊貪污嗎？

由此可見，只有訂立莫須有式的二十三條法例，香港才有望如祖國那般和諧穩定，欣欣向榮。香港政府就是深明此治國良策之妙處，才先後訂立「有犯罪或不誠實意圖而取用電腦」及「遊蕩」這兩條莫名其妙的刑事罪行。所以，舉凡上下載電影檔案、藏有色情照片、上facebook、玩ICQ、在網上撰寫政論文章，都一律可以被控「不誠實取用電腦罪」；而舉凡男人穿女裝上街、在河邊唱歌、穿低胸裝食雪糕、行路、吋警察，則統統可以被控「遊蕩罪」。可是，心水清的人士不難發現，就算香港已有此兩大莫須有式法例，卻仍然存在極其嚴重的法律漏洞。比方說，一名記者透過傳統郵寄方式撰稿支持平反六四，卻又堅持不離開家門半步，我們又能拿她怎麼辦呢？還能以甚麼法例控告她呢？難道每次都要找人向其編輯施加壓力那麼麻煩？就算那編輯真的聽聽話話，抽稿炒人，那記者卻仍是逍遙法外啊？我們偉大的黨領導又如何高枕安寢呢？

可能有人會問，外國也有國家安全法啊，你們這些覺得外國月亮特別圓的港狗洋奴，又為甚麼死要反對二十三條立法呢？還要搞到五十萬人上街那麼大陣仗？

很多人以為英國皇室徒具虛名，並無實權，但事實上，他們其實擁有足以影響全國的解散國會及任命首相等特權。只是，英國的君主通常不會行使這些特權－－你有種即管試試不任命在大選中勝出的政黨為執政黨，看看英國人民會有甚麼反應。

到底為甚麼要杯葛十一國慶？

近日發生的香港記者指揮疆人動亂事件，被某些有心人士上綱上線，牽扯到國內採訪自由的問題。看到那些歪曲事實指鹿為馬的賣國言論，我實在不得不說句公道話。

西方傳媒誣蔑我國全無言論自由，香港人立即信以為真；我這個真真正正身處國內的真中國人告訴你們中國充滿言論自由，你們偏偏不信，這是甚麼道理？這不是崇洋媚外是甚麼？我告訴你，我們在國內其實甚麼都可以說，甚麼都可以講，我們其實也很反共的，只是你們不知道罷了，因為你們的媒體都充斥著有心人士的謊言。一次我參與香港最高學府理工大學的高級學術會議（理工大學是香港最好的大學，我是那裡的訪問學者），討論到內地的一些情況的一些問題的一些情況，結果我為香港學生的言論之保守感到吃驚，便在台上戲說：「想不到你們香港人如此“愛國”，我們內地學者批評共產黨的言論比你們激烈多了！」台下的香港學生聞言後，立即感到十分慚愧，其中一名學生還驚嘆道：「原來內地的言論自由這麼開放！」不錯，我們很多內地人都罵共產黨，都罵城管，都罵貪官，由此可見內地根本就充滿言論自由。我們只是不准支持西藏獨立，不准反對一黨專政，不准購買六個蘋果四個橙罷了，但這根本不代表我們沒有言論自由，因為每天只能看中央電視人民日報的我們，本來就不會支持西藏獨立。

香港人明明是不折不扣的中國人，卻經常支持極端分裂國家勢力，實在讓人摸不著頭腦。為甚麼你們要做漢奸呢？為甚麼你們不想中國好呢？香港記者在新疆指手劃腳，煽動群眾暴亂，嚴重危害社會穩定，破壞宇宙和平進程，那壓根兒就是罪該萬死的獸行。我們偉大的中國政府卻本著仁義治國之道，血濃於水之情，無條件釋放你們回港與家人團聚，你們不好好感恩圖報三省吾身，還要批評我國政府的做法，把善行說成是暴行，這不是以怨報德是甚麼？這不是惡意中傷是甚麼？說我們中國政府殘暴不仁，根本是莫名其妙的指控，我們就連意圖顛覆國家的王丹劉曉波之流，都不過是關他個十年八載而已，換著是那所謂的「民主大國」美利堅，早就派FBI把叛國賊給暗殺了，那到底是誰比較殘暴？又誰比較不仁？我們為了顧全王丹及劉曉波的面子，甚至拒絕公開他們勾結外國勢力的罪証，世上還有比這更善良的政府嗎？

香港記者煽動疆人作亂，除了分明又有人（但不知是誰）收了外國勢力（但不知是哪個外國勢力）的錢外，還顯然出於一種逢中必反的心態。香港人這種反黨反國的奇怪心理，可以在下月的「杯葛六十周年國慶大行動」中清楚看出。原諒我指出這行動的荒謬之處，但就算中國真的沒有採訪自由，那又跟國慶有甚麼關係？你們打著捍衛新聞自由的旗幟，乘機搗亂這普天同慶的大日子，到底有甚麼居心？我不反對你們上街高呼顛倒黑白的口號，不反對你們繼續因為被外國勢力洗腦而白痴地攻擊自己的國家，但至少不要在十月一日搞事，好嗎？你們還嫌自己不夠羞家，還要繼續籠裡雞作反，讓西方反華勢力繼續恥笑我們不夠團結嗎？話說回來，你們到底為甚麼要支援那些意圖分裂國家的記者？你們到底想怎樣，難道誓要看到中國政府倒台才安樂？你們到底為甚麼要反中國？

所以，各位親愛的香港同胞，本人必須在此衷心地奉勸你們不要在國慶當天上街示威，除非爭取新聞自由不等如支持新疆獨立，除非不愛共產黨不等如不愛國。

港產片正垃圾

Photos retrieved from wordpress and blogspot





今天下午看了齣黑色幽默式音樂劇《Little shop of horros》（港譯《綠魔先生》），故事講述一事無成的主人翁Seymour Krelborn，為了培養一棵世間罕見的食人花，不惜成為連環殺手，把身邊的人續一分屍，以供食人花食用。食人花長大後，旋即成為城中話題，Seymour更因而一炮而紅，名利雙收，抱得美人歸。最後，走火入魔的Seymour，不止把最心愛的女人丟進食人花的血盤大口裡，還決定讓食人花吃掉自己。

小時候家境不太富裕，想看電影，唯有去快圖美租借錄影帶。租借一齣電影的費用，比一張戲票便宜不少，而且可以舉家一起觀看，所以實在划算得多。後來，質素較高的雷射影碟漸漸普及，爸爸便在青龍水上樂園的拍賣場投了一部很便宜的影碟機回來。可惜隔不了多久，LD已被VCD取代，VCD又被翻版VCD取代，那部無法讀取翻版VCD的便宜貨，唯有變成廢物。DVD推出後，有好一陣子堪稱無法被破解，追求高畫質的人唯有購買正版。當然，最後「無法被破解」這神話還是被破解了。那時候，據說黑幫販賣翻版光碟的盈利可高達數億元，當時到底有多少人選擇購買翻版，實在可想而知。不過，寬頻技術普及後，翻版光碟行業續漸式微，現在大部份人都選擇了下載電影檔案，甚至直接以串流形式在線觀看電影。從此，看電影不再是家庭活動，就算大家選擇在家裡看電影，也多半是躲在房間裡獨自觀看，而不會跟家人一同欣賞。

很懷念與家人擠在小小的客廳裡一起看電影的日子，那部八六年翻拍的《綠魔先生》電影版，就是在快圖美租回來跟家人一起看的。印象中，港產片好像很少如此天馬行空的黑色幽默喜劇，我想這多半跟商業考慮有關。早前的電台節目《光明頂》，談到香港創意產業一潭死水的問題，陶才子一如既往地咬定這是電影人「自我設限」所惹的禍，但坦白說，我實在不敢苟同。陶才子似乎認為，題材較另類的電影並非沒有捧場客，而只是沒有人敢拍。事實上，我也相信喜歡另類電影的香港人為數不少，但他們會否購票入場觀看這類電影又是另一回事。我相信芸芸香港電影人當中，其實仍不乏富有創意之士的，只是他們無法找到肯投資予這類電影的老闆罷了，因為現在大部份的港人都只會入場觀看娛樂性十足特效華麗的「大片」。沒有任何特效的文藝片，在家裡下載觀看就好了，又何必花錢購票入場？

華人較缺乏公民意識，是鐵一般的可悲事實，就算是一些高收入的有識之士，都還是完全不覺得下載電影有問題。當然非法下載電影違反道德與否，仍有其討論空間，但至少我們不能否認，當大部份人都只會購票入場觀看某類電影，那麼電影商就會傾向製作更多該類電影。至於香港電影人到底有沒有能力拍攝其他類型的電影，我們不會知道，因為他們根本沒有機會嘗試。

我不反對你們下載電影，但請不要一邊下載電影，一邊嘲笑港產片正垃圾吧。